26.05.2023 : शिवाजी महाराजांच्या ३५० व्या शिवराज्याभिषेकानिमित्त जलकलश रथयात्रेला राज्यपालांनी रवाना केले

26.05.2023 : छत्रपती शिवाजी महाराजांच्या ३५० व्या शिवराज्याभिषेक सोहळ्यानिमित्त मुंबई ते दुर्गराज रायगड येथे जलकलश घेऊन जाणाऱ्या रथयात्रेला आज राज्यपाल रमेश बैस यांनी राजभवन मुंबई येथून झेंडी दाखवून रवाना केले. यावेळी देशभरातील विविध नद्या व सरोवरातून संकलित केलेल्या सहस्त्र जलकलशांचे राज्यपालांच्या हस्ते पूजन करण्यात आले. सांस्कृतिक कार्य विभागाच्या पुढाकाराने आयोजित या कार्यक्रमाला सांस्कृतिक कार्य मंत्री सुधीर मुनगंटीवार, सांस्कृतिक कार्य विभागाचे प्रधान सचिव विकास खारगे, रायगड स्मारक मंडळाचे कार्यवाह सुधीर थोरात, श्री शिवराज्याभिषेक दिनोत्सव सेवा समितीचे सुनील पवार व बाळंभट व भिकमभट यांचे १७ वे वंशज महंत सुधीरदास महाराज यांसह शिवप्रेमी उपस्थित होते. यावेळी राज्यपाल बैस व सुधीर मुनगंटीवार यांच्या उपस्थितीत लहान मुले व युवकांनी सादर केलेली मैदानी खेळांची प्रात्यक्षिके दाखविण्यात आली.