08.07.2026: दृष्टिहीन महिला राष्ट्रीय क्रिकेट संघाची वाटचाल दाखवणाऱ्या ‘देख ले! इंडिया’ माहितीपटाचे लोक भवन येथे प्रदर्शन

08.07.2026: राज्यपाल जिष्णु देव वर्मा यांनी आज भारताच्या अंध महिला राष्ट्रीय क्रिकेट संघाच्या निवडक सदस्यांसह ‘देख ले! इंडिया’ हा माहितीपट लोकभवन मुंबई येथे पाहिला व संघाला तसेच खेळाडूंना कौतुकाची थाप दिली. युनिसेफ महाराष्ट्र तर्फे ‘देख ले ! इंडिया’ या माहितीपटाचे प्रदर्शन पाहिल्यानंतर राज्यपाल खेळाडू, युनिसेफचे अधिकारी व माहितीपटाच्या निर्मात्यांशी बोलत होते. माहितीपटात भारताच्या महिला दृष्टिहीन क्रिकेट संघाचा प्रेरणादायी प्रवास दाखवण्यात आला आहे. माहितीपट निर्माते मुकुंद मूर्ती, भारतीय अंध महिला राष्ट्रीय क्रिकेट संघाच्या उपकर्णधार गंगा कदम, क्रिकेट असोसिएशन फॉर द ब्लाइंड इन इंडियाचे अध्यक्ष तसेच समर्थनम ट्रस्ट फॉर द डिसेबल्डचे संस्थापक व व्यवस्थापकीय विश्वस्त डॉ. महांतेश जी. किवडसन्नावर, युनिसेफ महाराष्ट्रचे क्षेत्रीय अधिकारी संजय सिंह, युनिसेफच्या कम्युनिकेशन स्पेशालिस्ट स्वाती महापात्रा, खेळाडू प्रिया खीर व सुषमा पटेल, तसेच संघाच्या व्यवस्थापक शिखा शेट्टी उपस्थित होत्या.