14.04.2024 : राज्यपालांच्या उपस्थितीत राज्यस्तरीय अग्निशमन सेवा सप्ताहाचा राजभवन येथे शुभारंभ

14.04.2024 : राष्ट्रीय अग्निशमन दिनानिमित्त राज्यपाल रमेश बैस यांच्या प्रमुख उपस्थितीत आज राजभवन मुंबई येथे राज्यस्तरीय अग्निशमन सेवा सप्ताहाचा शुभारंभ करण्यात आला. यंदा अग्निशमन सेवेकरिता राष्ट्रपती पदक जाहीर झालेल्या महाराष्ट्र अग्निशमन सेवेतील ४ अधिकारी व कर्मचाऱ्यांना राज्यपालांच्या हस्ते पदक प्रदान करण्यात आले. राज्यपालांच्या हस्ते अग्निशमन सेवा कर्मचारी कल्याण निधी संकलन मोहिमेचा यावेळी शुभारंभ करण्यात आला. कार्यक्रमाला महाराष्ट्र अग्निशमन सेवा संचालक संतोष वारिक, मुंबई अग्निशमन दलाचे मुख्य अग्निशमन अधिकारी रवींद्र अंबुलगेकर, महाराष्ट्र अग्निशमन सेवेतील वरिष्ठ अधिकारी तसेच राज्यातील विविध शहरे व संस्थानांचे मुख्य अग्निशमन अधिकारी यावेळी उपस्थित होते. सन १९४४ साली मुंबई डॉकयार्ड येथे जहाजाच्या स्फोटात प्राण गमावलेल्या अग्निशमन अधिकारी व जवानांच्या स्मरणार्थ १४ एप्रिल रोजी राष्ट्रीय अग्निशमन सेवा दिवस पाळला जातो.