21.05.2023 : राज्यपाल, मुख्यमंत्री व केंद्रीय मंत्र्यांच्या उपस्थितीत जी – २० समुद्र स्वच्छता मोहिमेचा मुंबई येथे शुभारंभ

राज्यपाल, मुख्यमंत्री व केंद्रीय मंत्र्यांच्या उपस्थितीत जी – २० समुद्र स्वच्छता मोहिमेचा मुंबई येथे शुभारंभ

भारताच्या अध्यक्षतेखाली होत असलेल्या जी 20 देशाच्या परिषदेचा एक भाग म्हणून आज मुंबई येथील जुहू चौपाटी येथे जी – २० देशांच्या प्रतिनिधींच्या उपस्थितीत सागरी किनारा स्वच्छता मोहिमेचे आयोजन करण्यात आले होते.

केंद्रीय पर्यावरण, वन व वातावरण बदल मंत्रालयाच्या पुढाकाराने आयोजित या सागरी किनारा स्वच्छता मोहिमेला राज्यपाल रमेश बैस, मुख्यमंत्री एकनाथ शिंदे, केंद्रीय पर्यावरण व वन मंत्री भूपेंद्र यादव, केंद्रीय राज्यमंत्री अश्विनी कुमार चौबे, महाराष्ट्राचे पर्यटन, कौशल्य तसेच महिला व बाल विकास मंत्री मंगल प्रभात लोढा, केंद्रीय पर्यावरण सचिव लीना नंदन, बृहन्मुंबई महानगरपालिका आयुक्त इकबाल सिंह चहल, मुंबईचे पोलीस आयुक्त विवेक फणसळकर, राज्याच्या पर्यावरण विभागाचे प्रधान सचिव प्रवीण दराडे तसेच जी-20 देशांचे प्रतिनिधी यावेळी उपस्थित होते.

यावेळी राज्यपालांनी उपस्थितांना समुद्राचे किनारा स्वच्छ ठेवण्याची तसेच प्रदूषण व कचऱ्यापासून समुद्राचे रक्षण करण्याची शपथ दिली. स्वच्छता हा दैवी गुण असल्याचे सांगून आपले प्रत्येक कार्य पर्यावरण पूरक असले पाहिजे असे मुख्यमंत्री एकनाथ शिंदे यांनी यावेळी सांगितले. समुद्र स्वच्छता कार्यात लोकसहभाग महत्वाचा आहे असे नमूद करून सागरी स्वच्छता हे ही आज लोकचळवळ झाली आहे असे त्यांनी सांगितले.