30.10.2023 : बिहार, झारखंड, आंध्रप्रदेश व तेलंगणा नक्षलग्रस्त भागातील आदिवासी युवकांनी घेतली राज्यपालांची भेट

बिहार, झारखंड, आंध्रप्रदेश व तेलंगणा नक्षलग्रस्त भागातील आदिवासी युवकांनी घेतली राज्यपालांची भेट

“शिक्षण हीच विकासाची गुरुकिल्ली; आदिवासी युवकांनी नक्षलवादाविरुद्ध लढाईत देशाला साथ द्यावी: राज्यपाल रमेश बैस

शिक्षण हीच विकासाची गुरुकिल्ली आहे. शिक्षण व कौशल्याच्या माध्यमातूनच आदिवासी – जनजाती समाज उन्नती साधू शकेल व राष्ट्र विकासात योगदान देऊ शकेल. यास्तव आदिवासी युवक युवतींनी शिक्षणाची कास धरावी तसेच नक्षलवाद्यांच्या विरोधात पुकारलेल्या लढ्यात देशाला साथ द्यावी, असे आवाहन राज्यपाल रमेश बैस यांनी आज येथे केले.

बिहार, झारखंड, तेलंगणा व आंध्रप्रदेश या चार राज्यांमधील नक्षलग्रस्त जिल्ह्यातील २०० युवक- युवतींनी सोमवारी (दि. ३०) राज्यपाल बैस यांची राजभवन मुंबई येथे भेट घेतली, त्यावेळी ते बोलत होते.

केंद्रीय युवा मंत्रालयाच्या नेहरु युवा केंद्र संघटनेने गृह मंत्रालयाच्या सूचनेनुसार नक्षलग्रस्त जिल्ह्यांमधील आदिवासी युवकांसाठी १५ व्या आदिवासी युवक आदान प्रदान कार्यक्रमांचे आयोजन केले असून, या कार्यक्रमांतर्गत चार राज्यातील युवकांना महाराष्ट्र भेटीवर आणले आहे.

यावेळी विधानमंडळाच्या वि.स. पागे संसदीय प्रशिक्षण केंद्राचे संचालक निलेश मदाने, नेहरु युवा केंद्र संघटनेचे महाराष्ट्र व गोवा संचालक प्रकाश कुमार मनुरे, केंद्रीय राखीव पोलीस दलाच्या कमांडंट इंद्राणी यादव व नेहरु युवा केंद्राचे उपनगर जिल्हा युवक अधिकारी निशांत रौतेला व्यासपीठावर उपस्थित होते.

बिहार व झारखंड येथील आदिवासी युवक युवती पहिल्यांदाच मुंबई येथे आले असून ट्रेनमध्ये देखील पहिल्यांदाच चढले या गोष्टीची नोंद घेऊन आदिवासी युवकांची महाराष्ट्र भेट ही त्यांचे अनुभव विश्व समृद्ध करेल असा विश्वास राज्यपालांनी व्यक्त केला.

आज देशाच्या राष्ट्रपती आदिवासी समाजातील महिला आहेत. केंद्र शासनाने बिरसा मुंडा यांच्या जयंतीला ‘आदिवासी गौरव दिवस’ साजरा करण्याचा निर्णय घेतला आहे, असे सांगून आदिवासी समाजाचे स्वातंत्र्य लढ्यात योगदान फार मोठे असल्याचे राज्यपालांनी सांगितले.

आदिवासी बांधवांनी कौशल्ये आत्मसात करावी असे सांगताना आदिवासी युवक शेती करीत असतील तर त्यांनी त्यातील नवनवी कौशल्ये शिकावी व प्रगतिशील शेतकरी बनावे, असे राज्यपालांनी सांगितले.

आदिवासी युवकांनी केंद्र व राज्य शासनाच्या विविध कल्याणकारी योजनांची माहिती करुन घ्यावी व उद्योजक होण्याचा प्रयत्न करावा, असे राज्यपालांनी सांगितले.

यावेळी नेहरू युवा केंद्राचे संचालक प्रकाश कुमार मनुरे यांनी आदिवासी युवा आदान प्रदान कार्यक्रमाची माहिती दिली. आदिवासी युवक आदान प्रदान कार्यक्रमासाठी मदत करणाऱ्या व्यक्ती व अशासकीय संस्थांचा राज्यपालांच्या हस्ते सत्कार करण्यात आला.