22.03.2025: राज्यपालांच्या हस्ते डॉ हेडगेवार यांच्यावरील जीवनचरित्राचे प्रकाशन संपन्न

राज्यपालांच्या हस्ते डॉ हेडगेवार यांच्यावरील जीवनचरित्राचे प्रकाशन संपन्न

फुटीरतावादी प्रवृत्ती काही राज्यात कार्यरत; डॉ हेडगेवार यांचा एकतेचा संदेश अधिक प्रासंगिक: राज्यपाल सी पी राधाकृष्णन

फुटीरतावादी प्रवृत्ती आजही देशाच्या काही राज्यांमध्ये सक्रिय असून राष्ट्रीय स्वयंसेवक संघाचे संस्थापक डॉ केशव बळीराम हेडगेवार यांचा एकतेचा संदेश आज पूर्वीपेक्षाही अधिक प्रासंगिक आहे असे प्रतिपादन राज्यपाल सी पी राधाकृष्णन यांनी आज येथे केले.

राज्यपाल राधाकृष्णन यांच्या हस्ते शनिवारी (दि. २२ मार्च) डाॅ. हेडगेवार यांच्यावरील जीवन चरित्राचे राजभवन, मुंबई येथे प्रकाशन संपन्न झाले, त्यावेळी ते बोलत होते.

ब्रिटिश भारतीय युवा लेखक सचिन नंदा यांनी ‘हेडगेवार : अ डेफिनिटिव्ह बायोग्राफी’ या इंग्रजी चरित्रात्मक ग्रंथाचे लेखन केले आहे.

आपसात एकी नसल्यामुळे अवघ्या काही हजार ब्रिटिशांनी भारतावर अनेक दशके राज्य केले असे सांगून फुटीरतेमुळे महाराणा प्रताप यांना देखील पराभव पाहावा लागला होता, मात्र छत्रपती शिवाजी महाराज अश्या फुटीर प्रवृत्तींना पुरून उरले असे राज्यपालांनी सांगितले.

परकीय शासकांमुळे भारत एकसंध राष्ट्र झाले असे चुकीचे दवे केले जातात असे सांगून सम्राट अशोक यांच्या काळात भारत कितीतरी दूरपर्यंत जोडला गेला होता असे राज्यपालांनी सांगितले. सांस्कृतिक व अध्यात्मिक दृष्टया भारत नेहमीच एक राष्ट्र होते असे त्यांनी सांगितले.

राष्ट्रीय स्वयंसेवक संघाशी आपले नाते सांगताना संघाने देशासाठी निस्वार्थपणे काम करणारे हजारो स्वयंसेवक घडवले व आज संघ जगातील सर्वात मोठे राष्ट्रीय संघटन झाले आहे असे राज्यपालांनी सांगितले

यावेळी लेखक सचिन नंदा यांनी भावी काळात डॉ हेडगेवार हे जागतिक स्तरावचे आदर्श नायक असतील असे सांगितले. आपण लिहिलेले चरित्र हेडगेवारांचे विचार किंवा ‘हेडगेवारवाद’ समजण्यास मदत करेल असे त्यांनी सांगितले.

प्रकाशन सोहळ्याला एशियन पेंट्सचे प्रवर्तक जलज दाणी, आवादा ग्रुपचे अध्यक्ष विनीत मित्तल, मोहित डायमंड्सचे व्यवस्थापकीय संचालक मोहित मेहता, लेखक सचिन नंदा, एनएसईचे प्रमुख डॉ आशिषकुमार चौहान, रवींद्र संघवी, मिलिंद घुमरे आणि इतर निमंत्रित उपस्थित होते. समीर कोपीकर यांनी आभारप्रदर्शन केले.